ស្រូវទទួលបានទិន្នផលតិចតួចនៅឆ្នាំនេះ។ ប៉ុន្ដែទិន្នផលពោតនិងសណ្តែកនឹងទទួលបានផលច្រើន។ នេះបើតាមការគន់គូររបស់ព្រាហ្មណ៍បារគូ។ គួរជម្រាបជូនថា ការគន់គូរនេះ ធ្វើឡើងក្នុងព្រះរាជពិធីច្រត់ព្រះនង្គ័លនាថ្ងៃពុធ ទី៦ឧសភានេះ ដែលបានប្រារព្ធធ្វើនៅបរិវេណកីឡដ្ឋានខេត្តបាត់ដំបង ក្រោមព្រះរាជាធិបតីភាពរបស់ព្រះមហាក្សត្រ។
ឃឹម ច័ន្ទសុអហំ រាយការណ៍៖
ព្រះរាជពិធីច្រត់ព្រះនង្គ័ល ជានិមិត្តរូបនៃការផ្ដើមប្រកាសរដូវកាលបង្កបង្កើនផលថ្មីរបស់ប្រជាកសិករខ្មែរ។ តាមរយៈការផ្សងក្នុងចំណោមអាហារ៧មុខផ្សេងៗគ្នារួមមាន ស្រូវ ពោត សណ្តែក ល្ងរ ស្មៅ ទឹក និងស្រាផងនោះឃើញថា គោឧសភរាជ បានបរិភោគពោត និងសណ្ដែកច្រើនជាងគេ។ បើតាមការគន់គូរទស្សន៍ទាយរបស់ព្រាហ្មណ៍បារគូ ទំនាយទាយថា ទិន្នផលកសិកម្មឆ្នាំនេះនឹងទទួលបានទិន្នផលតិចតួចបំផុត លើកលែងតែពោត និងសណ្ដែកប៉ុណ្ណោះដែលទទួលបានទិន្នផលច្រើន។
ព្រះរាជពិធីច្រត់ព្រះនង្គ័លឆ្នាំនេះ បានប្រារព្ធឡើងនៅលើទឹកដីខេត្តបាត់ដំបង ដែលជាទឹកដីនៃជង្រុកស្រូវកម្ពុជា។ នៅក្នុងពិធីនេះ គេឃើញមានការចូលរួមយ៉ាងច្រើនកុះករពីសំណាក់មហាជន ក្រោមព្រះរាជាធិបតីដ៏ខ្ពង់ខ្ពស់របស់ព្រះមហាក្សត្រខ្មែរ សម្តេចព្រះនរោត្តម សីហមុនី។ ក៏មានផងដែរវត្តមានរបស់ថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាល និងអង្គទូតនានាប្រចាំនៅប្រទេសកម្ពុជា។
ជាការកត់សម្គាល់ ក្នុងព្រះរាជពិធីនេះ អាជ្ញាធរក៏បានរៀបចំស្តង់ពិព័រណ៍ចំនួន៥៣ស្តង់។ ស្ដង់ពិព័រណ៍ទាំង៥៣ស្ដង់នោះ មានដាក់តាំងបង្ហាញកសិផល ស្រូវ អង្ករ ដំឡូង សិល្បៈម្ហូបអាហារ បង្អែម និងរោងចក្រកែច្នៃដំឡូងទៅជាម្ស៉ៅមី។ជាពិសេសមានការដាក់តាំងរូបភាពផ្ទះបុរាណ វត្តបុរាណ ដែលនៅសេសសល់ក្នុងទឹកដីខេត្តបាត់ដំបងផងដែរ។
ព្រះរាជពិធីច្រត់ព្រះនង្គ័លឆ្នាំនេះ លោកអភិបាលខេត្តបាត់ដំបង ច័ន្ទ សុផល ត្រូវដើរតួធ្វើជាស្ដេចមាឃ តំណាងព្រះមហាក្សត្រ ហើយភរិយារបស់លោក ធ្វើជាមេហួ។
សូមជម្រាបជូនផងដែរថា តាំងពីដើមរៀងមក ព្រះរាជពិធីច្រត់ព្រះនង្គ័លតែងប្រារព្ធឡើងនៅវាលមេន (ទីព្រះស្រែព្រះមេរុ) ជាប់ព្រះបរមរាជវាំង ជារៀងរាល់ឆ្នាំ។ ដោយឡែកប៉ុន្មានឆ្នាំចុងក្រោយនេះ ពិធីនេះបានបង្វែរទៅប្រារព្ធធ្វើនៅតាមបណ្ដាខេត្តវិញ។ ជាក់ស្ដែងនៅឆ្នាំ២០១៤កន្លងទៅនេះ ពិធីច្រត់ព្រះនង្គ័លបានប្រារព្ធធ្វើនៅខេត្តកណ្ដាល៕
អ្នកស្រុកខ្ញុំ Naksruk Knhom 